चितवन, जेठ २६ । पूर्वी चितवनको राप्ती नगरपालिका वडा नं–६ हर्दीमा यात्रुबाहक बस दुर्घटना भएको छ ।
नारायणगढबाट वीरगञ्जतर्फ जादै गरेको ना ७ ख ६०५७ नम्बरको बस बिहीबार बिहान ८ बजेर ३५ मिनेटमा दुर्घटना भएको हो । बस दुर्घटना हुँदा १० जना घाइते भएका छन् ।
घाइते हुनेहरुमा भरतपुर–१८, गुञ्जनगरका ४५ वर्षीय भरत ढकाल, भरतपुर–२६ का ५६ वर्षीय दिलबहादुर विक, ६४ वर्षीया रेवारे विकको पुरानो मेडिकल कलेजमा उपचार भइरहेको प्रहरीले जनाएको छ ।
मकवानपुरको हेटौँडा उपमहानगर–१७ का ३३ वर्षीया मञ्जु सिलवाल, बाराको कलैया–१६ का ३१ वर्षीय मनोज गिरी, भारत रक्सौलका ७० वर्षीय भोलन गिरी, ४५ वर्षीय उगम पटेल, बारा, कलैयाका २२ वर्षीय निरञ्जन पासवान, रौतहटको कडरिया–२ का ३० वर्षीय सुरेश दास र १० वर्षीय आशकुमार यादवको स्थानीय अस्पतालमा उपचार भइरहेको प्रहरीले जनाएको छ ।
